महिला आत्मनिर्भर झाल्याशिवाय आत्मनिर्भर भारताचे स्वप्न अपूर्ण: लक्ष्मी पुरी, माजी राजदूत व आय एफ एस अधिकारी

  प्रभा खेतान फाउंडेशन तर्फे भारतभरातील हजारो विद्यार्थ्यांच्या कल्याणासाठी उपक्रम सुरु केला ‘मुस्कान’उपक्रम      

सशक्त भारताच्या दिशेने महिला आणि मुलींना आत्मनिर्भर बनवल्याशिवाय भारताला आत्मनिर्भर  भारत बनवण्याचे स्वप्न पूर्ण होऊ शकत नाही. भारत हा एक दाट लोकसंख्या असलेला देश आहे. देशातील महिला आणि मुलींना शिक्षण, कौशल्य आणि करिअर या प्रत्येक क्षेत्रात आत्मविश्वासाने सक्षम बनवावे लागेल.जेणेकरून ते पुढे जाऊन कोणत्याही क्षेत्रात प्रभुत्व मिळवू शकतील. जेव्हा स्त्री शक्ती स्वावलंबी होईल, तेव्हा आपले सरकार, आपला समाज, देशाची अर्थव्यवस्था, देश आणि मानवतेला त्याचा मोठ्या प्रमाणावर फायदा होईल. असे प्रतिपादन लक्ष्मी एम पुरी, माजी राजदूत व आय एफ एस अधिकारी यांनी प्रभा खेतान फाउंडेशन आयोजित ‘मुस्कान’ या ऑनलाईन उपक्रमात केले.

‘मुस्कान’ या प्रकल्पांतर्गत प्रभा खेतान फाऊंडेशन आणि एज्युकेशन फॉर ऑल ट्रस्ट आणि श्री सिमेंट यांनीसंयुक्त विद्यमाने  भारतभरातील हजारो विद्यार्थ्यांच्या कल्याणासाठी उपक्रम सुरु केला आहे. याअंतर्गत कथाकथन, नृत्य, संगीत, कठपुतळी, नाट्य, कला अशा सांस्कृतिक कार्यक्रमांच्या माध्यमातून भारतीय वारसा, साहित्य, संस्कृती यांची सविस्तर माहिती देऊन मुलांमध्ये कुतूहल निर्माण केले जाणार आहे. या प्रकल्पाच्या माध्यमातून गरजू बालकांना पौष्टिक आहार व मूलभूत आरोग्य सुविधा पुरविल्या जाणार आहेत.

आतापर्यंत देशभरातील 100 हून अधिक शाळा मुस्कानच्या विविध प्रकल्पांशी संबंधित आहेत. रस्किन बाँड आणि सुधा मूर्ती यांसारख्या प्रख्यात भारतीय लेखक आणि सामाजिक कार्यकर्त्यांना या उपक्रमाशी जोडून मुस्कानने भारतीय साहित्य आणि त्याच्या सांस्कृतिक वारशावर संवादात्मक सत्र सुरू केले आहे. शाळा आणि शैक्षणिक संस्थांच्या आंतरराज्य नेटवर्कच्या सहकार्याने आयोजित केलेल्या, या सत्रांनी परफॉर्मिंग आर्ट्सला व्यापक शालेय अभ्यासक्रमात समाकलित केले आहे, प्रतिभावान विद्यार्थ्यांना राष्ट्रीय स्तरावर कामगिरी करण्यास मदत केली जात आहे.

सुश्री पुरी ‘मुस्कान’ च्या ऑनलाइन वेबिनार सत्राच्या प्रमुख पाहुण्या आणि वक्त्या होत्या, ज्यात देशभरातील मुख्याध्यापक, शालेय विद्यार्थी, शिक्षक आणि पालक उपस्थित होते. प्रभा खेतान फाऊंडेशनच्या कार्यक्रम सल्लागार सुमित्रा रे यांनी याचे संचालन केले. या सत्रात सुश्री पुरी म्हणाल्या, “सर्व मुलींना माझा संदेश शाश्वत विकास उद्दिष्टे किंवा SDGs साठी मार्गदर्शक बनण्याचा आहे. संकल्पाची सुरुवात घरापासून करा आणि जीवनात यश मिळविण्यासाठी प्रयत्नशील राहा.”